Mga Kababayan, "Pasko na naman, o kay tulin ng araw," ang sabi nga sa kanta. Matulin po ang mga araw, dahil halos isang taon na po ang nakaraan nang aming simulan itong column ("ITANONG MO KAY CONGEN") sa Pinoy Brunei upang aming maipaliwanag ang mga patakaran ng Pasuguan ng Pilipinas sa ating mga kababayan.

Para sa atin, ang Pasko ang pinakamasayang araw ng taon.

Ito ang pagkakataong magkasama-sama ang lahat ng miyembro ng pamilya.

Libo-libong Pilipino ang umuuwi sa ating bayan upang makapiling ang kani-kanilang mahal sa buhay at ipagdiwang ang pagsilang ng ating Panginoong Hesukristo.

Ngunit sa kabila ng pagsasaya at pagdiriwang, marami sa ating kabababayan ang nagluluksa ngayon dahil sa pinsala dulot ng bagyong Sendong. Pamilya, tahanan, ari-arian, ang lahat po ay nawala sa kanila.

Ito po ay isang pagkakataon upang ating ipakita ang pakiki-isa sa mga nasalanta ng bagyong Sendong.

Sabi nga po ni Ambassador Ochoa sa kanyang Pamaskong Mensahe sa Filipino Community: "ang diwa ng Pasko ay nananahan sa isang pusong nagbabahagi ng pagmamahal at pagmamalasakit sa kapwa."

Nawa'y makamit natin ang tunay na diwa ng Pasko.

Sa ngalan ng aking maybahay, si Minister and Consul Celeste Vinzon Balatbat, kami ay bumabati sa inyo ng Maligayang Pasko at Manigong Bagong Taon!!!

Lubos na gumagalang,

Raymond R. Balatbat
Minister and Consul General