Nakatakdang ilunsad bukas nina Manny Pacquiao at Timothy Bradley, Jr. ang kanilang promotional tour sa pamamagitan ng isang two-city, coast-to-coast media tour sa United States.

Ngunit natabunan ito ng isyu sa kanilang hindi na naman natuloy na salpukan ni Floyd Mayweather, Jr.

"He talks, he says all this, but you know what: He doesn't want the fight," wika ni Pacquiao sa panayam ng Yahoo! Sports kahapon. "I want the fight. I'm the one who has wanted this fight all along."

Matapos tanggihan ang panukala ni Pacquiao na 50-50 purse split para ma­tuloy ang kanilang mega-fight, pinili ni Mayweather na labanan si Miguel Cotto ng Puerto Rico sa Mayo 5.

Sinabi ng Filipino world eight-division champion na inalok siya ng American five-division titlist ng guaranteed purse na $40 milyon. Ngunit hindi kasama ang kikitain sa pay-per-view.

"He offered me $40 million, and no pay-per-view (money)," ani Pacquiao kay Mayweather. "No pay-per-view. Can you believe that? Would you do that? Come on. What would he say if I offered him $50 million--not $40 million, $50 million--and said 'No pay-per-view. Take this money and be happy, but no pay-per-view.' He wouldn't do it, either."

Ngunit tinawanan lamang ni Leonard Ellerbe, ang manager ni Maywea­ther, ang pahayag ni Pacquiao.

"What Manny Pacquiao has to understand, and I don't think he understands this part, is that if the fight ever comes off, he'll never make the kind of money that Floyd makes," sabi naman ni Ellerbe.

Idedepensa ni Pacquiao (53-3-2, 38 KOs) ang kanyang hawak na World Boxing Organization (WBO) welterweight crown laban kay Bradley (28-0-0, 12 KOs) sa Hunyo 9 sa MGM Grand sa Las Vegas, Nevada.

---source PSN